स्वेरीत चौथा ‘मासिक योग दिन’ उत्साहात साजरा

छायाचित्र- स्वेरीच्या हिरवळीवर चौथा ‘योग दिन’ साजरा करण्यात आला. यावेळी कॅनडा मधील योग प्रशिक्षिका जॅकलीन कँप यांचे स्वागत करताना इंजिनिअरिंगच्या उपप्राचार्या डॉ. मिनाक्षी पवार सोबत डावीकडून स्वेरीचे संस्थापक सचिव व कॉलेज ऑफ इंजिनिअरिंगचे प्राचार्य डॉ.बी.पी.रोंगे व डॉ. येळीकर तसेच योगा करताना स्वेरीचे प्राध्यापक व विद्यार्थी.

जोशाबा टाईम्स वेब न्युज पोर्टल

-श्रीकांत कसबे

पंढरपूर- ‘चेहऱ्यावरील प्रसन्नता ही खऱ्या अर्थाने आपला आरसा असून प्रसन्न असल्यामुळे यश अधिक गतीने मिळते व आपले कार्य अधिक क्षमतेने पुढे जात असते. यासाठी नियमित योग करणे आवश्यक आहे. आपण योग करताना व प्राणायाम करताना नेहमी प्रसन्न मनाने आणि डोळे बंद करून प्राणायाम केला पाहिजे. डोळे बंद करून प्राणायम केल्यामुळे सकारात्मक उर्जा निर्माण होते तसेच चेहऱ्यावर हास्य ठेवल्यास सकारात्मक प्रतिसाद मिळतो.’ असे प्रतिपादन कॅनडा मधील योग प्रशिक्षिका जॅकलीन कँप यांनी केले.

‘जागतिक योग दिन’ हा प्रत्येक वर्षी दि.२१ जून रोजी आंतरराष्ट्रीय स्तरावर अर्थात जगभरात साजरा केला जातो. दि.२१ जून रोजी स्वेरीत मुख्य ‘जागतिक योग दिन’ साजरा करण्यात आला. यावेळी स्वेरीचे संस्थापक सचिव व कॉलेज ऑफ इंजिनिअरिंगचे प्राचार्य डॉ.बी.पी.रोंगे यांनी यापुढेही ‘स्वेरी अंतर्गत असलेल्या वसतिगृहातील विद्यार्थ्यांसाठी प्रत्येक महिन्याच्या दि.२१ तारखेला सामुहिक ‘योग दिन’ साजरा करण्याचे घोषित केले होते. तेंव्हापासून प्रत्येक महिन्याला न चुकता स्वेरीत ‘योग दिन’ सुरु आहे. नुकताच हा चौथा ‘योग दिन’ स्वेरीत साजरा करण्यात आला. विशेष म्हणजे या उपक्रमाला वसतीगृहातील सर्व विद्यार्थ्यांनी उत्साहाने प्रतिसाद दिला. यावेळी कॅनडा येथील योगशिक्षक असलेल्या जॅकलीन कँप ह्या मार्गदर्शन करत होत्या. जॅकलीन कँप ह्या कॅनडामध्ये पूर्ण वेळ ‘आर्ट ऑफ लिव्हिंग’ च्या योग प्रशिक्षिका आहेत. तसेच एक योग प्रशिक्षिका म्हणून आजपर्यंत त्यांनी २२ देशांमध्ये प्रवास करून तेथील नागरिकांना योग प्रशिक्षण देण्याचे काम केले आहे. योग अभ्यास किती महत्वाचा आहे ते त्या स्वेरी च्या विद्यार्थ्यांना पटवून सांगत होत्या. यावेळी त्यांनी उपस्थित विद्यार्थी- विद्यार्थिनी व शिक्षक-शिक्षकेतर कर्मचारी यांच्याकडून सांधे, हाडे, शरीराच्या अवयवांचे तसेच श्वासांचे व्यायाम करवून घेतले. त्यामुळे विद्यार्थी व सर्वजण अधिक उत्साहित दिसत होते. गौरी थोरात, यांच्या सह इतर विद्यार्थ्यांनी ‘योग केल्यामुळे आमचा अभ्यासासाठीचा उत्साह वाढला असून शारीरिक आराम देखील मिळत असल्याचे सांगितले. सदरचा कार्यक्रम स्वेरीचे संस्थापक सचिव व कॉलेज ऑफ इंजिनिअरिंगचे प्राचार्य डॉ.बी.पी.रोंगे यांच्या मार्गदर्शनाखाली, स्वेरीचे कॅम्पस इन्चार्ज डॉ. एम.एम.पवार यांच्या सहकार्याने, डॉ. येळीकर, बी.फार्मसीचे प्राचार्य डॉ. मिथुन मणियार, डिप्लोमा इंजिनिअरिंगचे प्राचार्य डॉ.एन.डी. मिसाळ, डी.फार्मसीचे प्राचार्य प्रा.सतीश मांडवे, इंजिनिअरिंगच्या उपप्राचार्या डॉ. मिनाक्षी पवार यांच्या नेतृत्वाखाली, विद्यार्थी अधिष्ठाता डॉ.महेश मठपती, सर्व अधिष्ठाता, विभागप्रमुख, प्राध्यापक वर्ग, विद्यार्थी, विद्यार्थिनी यांच्या उपस्थितीत पार पडला. या कार्यक्रमाच्या यशस्वीतेसाठी स्वेरीचा क्रीडा विभाग तसेच अभियांत्रिकी व फार्मसीचे ‘राष्ट्रीय सेवा योजना’ विभाग, ‘कमवा व शिका’ योजनेमधील प्राध्यापक व विद्यार्थ्यांनी परिश्रम घेतले. प्रथम वर्ष अभियांत्रिकीचे विभागप्रमुख डॉ.यशपाल खेडकर यांनी सूत्रसंचालन करून उपस्थित सर्वांचे आभार मानले.